Залилан хийсэн ламтан 114 жилийн ял сонсов
2018 оны 8 сарын 10
Тайландын эрүүгийн шүүх Буддын шашны ламтан асан Вирапхон Сукпхоныг шоронд 114 жил хорих ялаар шийтгэжээ. Энэ ламтан эр 29 удаагийн үйлдлээр их хэмжээний мөнгө бусдаас залилж авсныхаа төлөө шүүхийн хаалга татсан билээ. Гэхдээ сүүлд нь 114 жилийн ялыг шүүх шоронд 20 жил хоригдох ялаар сольжээ. Тайландын Эрүүгийн хуульд хэрвээ тухайн хүн хуулийн нэг зүйл заалтаар буруутгагдаж байгаа бол иймэрхүү өршөөл үзүүлэхийг заасан байдаг аж. 

Бизнес эрхлэгчид ашиг, орлогоо нэмэгдүүлж, амжилт олохын тулд энэ ламтныг үйлдвэр, байгууллага дээрээ урьж ном уншуулдаг байсан гэнэ. Вирапхон ламтан 2009 онд дэлхий дээрх хамгийн том Будда бурхны үнэт чулуугаар хийсэн хөшөөг босгох мөрөөдөлтэй тухайгаа зарласан билээ.Дэргэд нь том сүм хийд барьж байгуулах болсон талаараа ч зарласан. Энэтхэгийн Индра бурхан зүүд нойронд нь түүнд ийм даалгавар өгсөн гэж тэрбээр сүсэгтнүүдийг мунхруулжээ. Ийнхүү залилан мэхлэх аргаар энэ ламтан 2009-2013 онуудад нэлээн чинээлэг олон арван сүсэгтнүүдээс 10-аад сая долларын хандив авчээ. 

Гэтэл энэ мөнгөөрөө ламтан үнэтэй машин худалдан авч, хилийн чанадад ард хувцастай зугаалж байсан гэнэ. Тэр ч бүү хэл, гадаадад зорчихын тулд гоёмсог нисэх онгоц хүртэл худалдаж авсан байв. Эцэс сүүлдээ ламтан насанд хүрээгүй охиныг хүчиндсэн бөгөөд сүм хийдээс хөөгдөж, оргон зайлсан байдаг. Хувийн онгоцоороо тэрбээр АНУ руу ниссэн байна. Олон сая доллараа түүнд хулхидуулсан сүсэгтнүүд экс ламтныг шүүхэд өгчээ. 
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
АТГ-ын дарга Х.Энхжаргалыг огцруулах шаардлагатай юу?
  • Шаардлагатай
  • Шаардлагагүй
  • Мэдэхгүй