Дотоодын 80 гаруй ААН бүтээгдэхүүн, үйлчилгээгээ танилцууллаа
2018 оны 9 сарын 10
Улаанбаатар Түншлэл-2018 олон улсын үзэсгэлэн худалдааны энэ жилийн онцлог нь оролцогч аж ахуйн нэгж, сонирхсон үйлчлүүлэгч бүрд банк санхүүгийн болон бизнесийн зөвлөх компаниуд үнэ төлбөргүй бизнесийн зөвлөгөө өгч, B2B уулзалтуудыг зохион байгуулсан явдал байсан юм.

Үзэсгэлэнд “Мах импекс” ХК, “Улаанбаатар хивс”, “Жүр Үр”, “Таван богд”, “Монос Хүнс”ХХК, “Үлэмж органик” ХХК, “Хатансүйх” ХХК, “Хүнс комплекс” ХХК, “Сүү” хувьцаат компани, “Энхжин сувинер”, “Нүүдэлчний соёл” ХХК, “Өгөөж чихэр боов” ХХК зэрэг 80 гаруй үйлдвэрлэгч, Тайван, Хонг-Конгийн компаниуд бараа бүтээгдэхүүнээ танилцуулан борлуулав.

Зохион байгуулагчдын зүгээс энэ жилийн үзэсгэлэнд оролцогч аж ахуйн нэгжүүдийн бараа бүтээгдэхүүний сав баглаа боодол өнгө үзэмж, чанарын хувьд сайжирч, илүү эко тал руугаа чиглэсэнд сэтгэл хангалуун байна гэж байлаа.

Улаанбаатар Түншлэл-2018 олон улсын үзэсгэлэн худалдааны ерөнхий ивээн тэтгэгч “Жүр Үр” компанийн хувьд үзэсгэлэнгийн онцгой оролцогч байв. Бялууг урлагийн бүтээл болгон хийсэн нь үзэсгэлэнг үзсэн хэн бүхнийг бишрүүлсэн гэхэд хилсдэхгүй. Тус компанийн борлуулалт хариуцсан менежер П.Нямсүрэн хэлэхдээ, дэлхийн нийтэд пантон бялууг хийдэг болсон. Бид ч хэрэглэгчдэдээ пантон бялууг амтлуулахаар шийдээд сүүлийн 2 жил бэлдсэн. Пантон бялууг хийхэд тухайн хүний мэдрэмж, өнгөний хослол, гарын ур дүй шаарддаг. Цаг хугацааны хувьд ч энгийн бялуу хийхээс илүү цаг ордог. Гэсэн хэдий ч хэрэглэгчдэдээ илүү сайхныг амтлуулж, мэдрүүлж байгаа гэж бодохоор сайхан байдаг” гэв.

Үзэсгэлэнгийн үеэр үндэсний үйлдвэрлэгчид зах зээлийн судалгаагаа сайн хийж, гадаад руу гаргаж буй түүхий эдээ дотооддоо аль болох нэмүү өртгөөр эцсийн бүтээгдэхүүн болгон гаргахад анхаарч, дундын хөрөнгө оруулалт хийх шаардлагатайг хэлж байлаа. Мөн салбарын чиглэлээрээ аж ахуй нэгжүүд хөрөнгө оруулалтаа нэгтгэх замаар нэг корпораци болон гарч ирвэл гаднаас авахгүйгээр гол гол бүтээгдэхүүнээ дотооддоо үйлдвэрлэх бүрэн боломжтой гэж байв.

Үзэсгэлэнд анх удаа оролцож буй Баянзүрх дүүргийн хөдөлмөр Нийгмийн халамжийн хэлтсийн “Эко урлал”-ын төвийн ерөнхий менежер Р.Цэнд-Аюуш: Дүүргийнхээ 12 гар урлаачдын бүтээлээр үзэсгэлэнд оролцож байна. Бид байгальд ээлтэй хоёрдогч түүхий эдийг ашигласан бүтээгдэхүүн хийдэг. Тухалбал, эко лаа, саван, арьсан эдлэл, эко модон эдлэлүүд, арьсан түрийвч зэрэг юм. Манай бүтээлүүд эко гэдэг утгаараа ямар ч химийн бодис оролцуулдаггүй, тухайлбал лааг шар буурцгийн тос, байгалийн үнэр болох арц ганга, өнгийг нь байгалийн будаг ашиглаж хийдэг. Хэрэглэгч хүссэн хэлбэр өнгөөрөө захиалахад л болно. Мөн бид гар урлал бүтээл хийх сонирхолтой хүмүүст зориулан сургалт зохион байгуулдаг. Ямар ч насны хүн манайд хандаж болно.

“Декупаж Монгол” урлан сургалтаараа бид бүх төрлийн материалаар хийж болох зүйлсийг хүмүүстээ зааж сургадаг. Түүнчлэн өөрөө гэртээ хийсэн бүтээлээ ч манай Facebook, сайтаар дамжуулан борлуулах боломжтой. Хийсэн бүтээлээ борлуулахын тулд лангуу түрээслэх, зөөх шаардлагагүй гэсэн үг. Сайтын маань онцлог нь гэвэл Монголд анх удаа урамшууллын системийг нэвтрүүлсэн явдал. Уг сайтад байгаа бараа бүтээгдэхүүнийг өөрөө хэн нэгэнд санал болгон борлуулсан тохиолдолд урамшууллынхаа 30 хувийг нь өөрөө авах боломжтой” гэлээ.

Тэрбээр манай бүтээгдэхүүн цор ганц бүтээл болдог гэдгээрээ онцлог. Сүүлийн үед бид гар урлалынхаа бүтээлүүдэд Монгол бичгийг түлхүү хэрэглэж байгаа. Танхимаас биднийг дэмжиж, байнга үзэсгэлэн худалдаа арга хэмжээнүүддээ оролцуулдагт баярлаж явдаг гэсэн юм.

Монголчуудын уламжлалт гоо зүйн мэдрэмжийг өвөрмөцөөр илэрхийлж, монгол зургийн аргаар, өнгө будгийн сонирхолтой нийлэмжээр урласан бүтээлүүд нь үнэхээр харц булааж байв. “Эрхэмсэг” хэмээх энэхүү бүтээлийг “Нүүдэлчний соёл” компани үйлдвэрлэн гаргаж байгаа юм.

“Нүүдэлчний соёл” компанийн зураач О.Номин-Эрдэнэ шинэхэн брэндийнхээ талаар хэлэхдээ, бид аяга, халуун баригч сав, mouse pad зэргийг өдөр бүр хэрэглэдэг. Өдөр бүр хэрэглэдэг зүйлсээ гоё сайхан, өнгөлөг байлгавал илүү сонирхолтой шүү дээ. Уламжлалт соёлыг орчин үетэй нийцүүлсэн уран зургийг хамгийн сайн чанарын материалаар хийгдсэн бүтээгдэхүүнүүд дээр буулгасан нь “Эрхэмсэг”-ийн хамгийн том онцлог. Миний хувьд эдгээр бүтээлээ монгол зургийн аргаар зурсан. Зураг тус бүр цаанаа утга агуулга, бэлгэдлийг агуулснаараа мөн онцлог юм.

Та бүхэн бидний сэтгэл зүрх, оюун ухаанаа шингээсэн бүтээгдэхүүнийг худалдан аваарай. Та бүхэнд таалагдана гэдэгт итгэлтэй байна” гэлээ.

Мөн үзэсгэлэнгийн онцлох нэг бүтээгдэхүүн бол “Чакра” брендийн бүтээгдэхүүн байв. “Голд кинг Берри” ХХК нь Монголдоо анх удаа байгалийн цэвэр түүхий эдийг орчин үеийн дэвшилтэт технологиор боловсруулан үйлдвэрлэсэн хүнсний нэмэлт бүтээгдэхүүн юм. Монголчууд бид гадаадын олон төрлийн хүнсний нэмэлт бүтээгдэхүүнийг хэрэглэдэг. Үр дүн нь хэр байдгийг мэддэггүй гэхэд хилсдэхгүй. Зарим нь бүр хугацаа нь баталгаатай эсэх нь эргэлзээтэй. Харин одоо бид эх орныхоо унаган зэрлэг байгальд ургасан супер хүнс хэмээн нэрлэгддэг хаан жимс чацаргана, нэрс, аньс, хуш модны самар болон хушганы самар, гүүний саам, хатаасан айраг, монгол саримс, монгол тахианы өндөгний хальснаас гарган авсан кальци ашиглан анх удаа зэргийг ашиглан хийсэн өндөр илчлэг шимт бодистой хүнсний нэмэлт бүтээгдэхүүнийг хэрэглэх боломжтой болж байна. Эдгээр жимсний шүүсийг шахаж тоосруулах аргаар хатааж, ургамлын гаралтай желатин капсулд савлан хэрэглэгчдэд хүргэдэг байна. Нийт 10 гаруй нэр төрлийн хүнсний нэмэлт бүтээгдэхүүнээрээ үзэсгэлэнд оролцож байна. Тухайлбал, цэцгийн тоос, гүүний саам, хатаасан айраг, монгол саримс, нэрс, аньсны бэлдмэлүүд юм.

Тус компани Япон Улсад өөрийн албан ёсны дистрибьютер компанитай гэрээлэн албан ёсоор бүтээгдэхүүнээ экспортолж байгаа юм.

Монгол орныхоо онгон хөрсөнд ургасан экологийн цэвэр органик түүхий эдийг ашиглан бүтээгдэхүүнээ хийдэг компаниудын нэг “Инару брэнд” юм.  Эднийх ганга өвс, хаан жимс гэдэг чацаргана жимсний тос, зөгийн бал, лав гэх мэт олон төрлийн цэвэр байгалийн гаралтай түүхий эдүүдийг ашиглан үйлдвэрлэдэг. Тус компани 9 нэрийн 22 төрлийн органик ахуйн болон арьс арчилгааны бүтээгдэхүүнийг эх орондоо үйлдвэрлэж байна. Тус компанийн адууны тос, давирхайтай гарын тос онцгой өвөрмөц үнэр хийцтэй.

Монголчууд эртнээс адууны тосыг шарх, түлэнхий экзем зэрэг арьсны өвчнийг анагаахад хэрэглэдэг.

Адууны тостой органик савангийн найрлага дахь адууны тос нь ханаагүй тосны хүчил болох линолийн хүчлийг ойролцоогоор 70 хувь орчим агуулсан байдаг ба энэ нь хурдан шингэж арьсны доор тослог бүрхүүлийг үүсгэдэг. Ингэснээр чийглэг, дулаан байдал үүсэж улмаар цусны эргэлтийг сайжруулдаг. Тосон бүрхүүлээр гаднаас нь тусгаарлан, агаарыг шахан гаргаж исэлдэлтээс хамгаалах ба ингэснээр арьсанд нян бохирдол орохгүй байх онцлогтой. Мөн адууны тос нь А, Д аминдэмээр баялаг байдаг.

Давирхайтай гарын тос нь найрлагадаа омега 3, 6 мөн Д, С, А, К, Е витаминуудаар баялаг бөгөөд эмчилгээний зориулалттай гарын тос юм.

“Мишээл экспо”-д 4 өдөр үргэлжилсэн Улаанбаатар Түншлэл-2018 олон улсын үзэсгэлэнгийн танхим хөл хөдөлгөөнөөр дүүрэн байлаа.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Багш нарын ажил хаялтыг та дэмжиж байна уу?
  • Дэмжиж байна
  • Эсэргүүцэж байна
  • Мэдэхгүй