Өсвөр насныхны 91% нь фэйсбүүкээр хувийн мэдээллээ алддаг
2018 оны 9 сарын 13
ХЗДХЯ, Монгол улс дахь гэмт хэргээс урьдчилан сэргийлэх ажлыг зохицуулах зөвлөл, ЦЕГ хамтран цахим гэмт хэргээс урьдчилан сэргийлэх, таслан зогсоох “UNFRIEND” хөдөлгөөн улс орон даяар өрнөж байна. Энэ ажлын хүрээнд  цахим орчиноор дамжуулан Секс сүрдүүлэг хийх, садар самууныг сурталчилах гэмт хэргээс урьдчилан сэргийлэх, таслан зогсоох, иргэд олон нийтэд зөв мэдээ, мэдээллийг хүргэх зорилготой олон ажлууд хийгдэж байна. Тиймээс иргэд, олон нийтэд цахим орчин дахь секс сүрдүүлэг, энэ төрлийн гэмт хэргийн талаар дараах товч ойлголтыг хүргэж байна. 

Секс сүрдүүлэг гэдэг нь гэмт этгээд нь бусдын хагас, бүтэн нүцгэн зураг, бичлэг болон хувийн мэдээллийг олон нийтийн сүлжээ ашиглан залилан авах, хууль бусаар нэвтрэн олж авах эсхүл өмнө хань харилцаатай байх үедээ хадгалах зэргээр мэдээллийг авч бусдад биет бус байдлаар заналхийлэн, сүрдүүлэн тодорхой үйлдэл хийх, хийхгүй байхыг шаардахыг хэлдэг байна. 

Энэ төрлийн гэмт хэргүүд сүүлийн жилүүдэд ихээр гарах болжээ. Тэр дундаа олон улсад энэ төрлийн гэмт хэргийн нийт хохирогчийн 71 хувь нь насанд хүрээгүй хүүхэд, залуус байдаг аж. Мөн судалгаагаар секс сүрдүүлгийн гэмт хэргийн шүүхээр шийдэгдэн яллагдсан гэмт этгээтүүд нь бүгд эрэгтэй гэж гарчээ. Харин насанд хүрээгүй хохирогчид мэдээлэл алдсан байдлаар судалгаа хийхэд 91 хувь нь олон нийтийн сүлжээгээр хууран мэхлүүлэн мэдээллээ алдсан байдаг байна. Олон нийтийн сүлжээгээр хууран мэхлүүлэх гэдэг нь фэйсбүүк, инстаргам зэрэг сүлжээгээр худал хаяг нээн хүний дурьд хувирч хохирогчтой харилцаж хувийн мэдээллээ өгөх хэмжээний итгэлийг олж авахыг хэлнэ. Харин насанд хүрсэн хохирогчид мэдээлэл алдсан байдлаар судалгаа хийхэд 43 нь компьютероо ямар нэгэн аргаар хакердуулан мэдээллээ алдсан байдаг гэдгийг албаныхан мэдээлж байна.

Цахим орчинд хувь хүний болон байгууллагын интернэт сүлжээнд холбогдсон бүх компьютерт лицензтэй үйлдлийн систем, вирусны хамгаалалтын систем зэргийг суулгах, танихгүй хүнээс ирсэн хавсралт, файл зэргийг нээхгүй байх, таньдаг байсан ч давхар утсаар болон өөрийн биеэр асууж шалгаж байх, хувийн мэдээллээ бусадад олон нийтийн сүлжээ, шуудангаар бусад руу явуулахгүй байх, цахим орчинд бусдаар дамжин танд хүрэх гэсэн гэмт этгээдүүд олон бий гэдгийг ойлгох, хувийн мэдээлэл алдаснаар та секс сүрдүүлэгийн, цахим луйварын гэмт хэргүүдэд өртөх боломжтой болж байгааг анхааруулж байна.

Эх сурвалж: Замын Цагдаагийн алба
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна