Америкийн хамгийн баян 10 хүн
2018 оны 10 сарын 5
Форбс сэтгүүлийн шинжээчид хамгийн баян америкчуудын жагсаалтыг гаргажээ. Эхний 400 баянд багтсан хүмүүсийн хөрөнгөний нийт хэмжээ 2,9 их наяд доллар болсон гэнэ. Энэ нь өмнөх жилийнхээс долоон хувиар өссөн үзүүлэлт юм. Энэ эд хөрөнгөний талыг нь 45-хан хүн эзэмшдэг байна. АНУ-ын хамгийн баян 400 хүний жагсаалтад Ерөнхийлөгч Дональд Трамп 138 байраар ухарчээ. Өнгөрсөн жил Америкийн төрийн тэргүүн жагсаалтын 248-д 3,1 тэрбум долларын хөрөнгөтэйгөөр бичигдэж байсан юм. Харин 2016 онд тэрбээр 156-д жагсаж байжээ. 

1. Жефф Безос 

54 настай энэ бизнесмэн эрийн хөрөнгө 160 тэрбум доллараар үнэлэгдэв. Тэрбээр Amazon.com цахим компанийг үндэслэгч бөгөөд The Washington Post хэвлэлийн газрын эзэн билээ. Сонирхолтой нь тэрбээр нэгэн уран сэтгэмжит кинонд харь гаригийн хүний дүрийг бүтээсэн юм. 

2. Билл Гэйтс

Пол Аллены хамтаар Майкрософт компанийг байгуулсан 63 настай Билл Гэйтсийн эд хөрөнгө 97 тэрбум доллараар үнэлэгджээ. Тэрбээр 10 жилийн өмнө Майкрософт компанийн захирлын ажлаа хүлээлгэж өгсөн бөгөөд Захирлуудын зөвлөлийн албан бус даргаар үлдсэн юм. Буяны санг эхнэр Милинда Гэйтсийн хамтаар байгуулсан. 

3. Уоррен Баффетт

Дэлхийн хамгийн нэр алдартай, томоохон хөрөнгө оруулагчдын нэг Уоррен Баффетт 88 настай бөгөөд дэлхийн түүхэнд хамгийн томд тооцогдох буяны үйлстэнгээр тодорч байсан юм. 2010 оны зун Баффетт өөрийн нийт эд хөрөнгийн 100 гаруй хувийг буюу 97 тэрбум долларыг хүмүүнлэгийн таван санд эргэлт буцалтгүй хандивласан билээ. Одоогоор түүний хөрөнгийн хэмжээ 88,3 тэрбум доллартай тэнцдэг. Хандивынхаа дийлэнх хэсгийг Билл Гэйтсийн удирддаг санд өгсөн гэдэг. Хүн төрөлхтний түүхэнд хэн ч ийм том хандив өгч байсангүй. 

4. Марк Цүкерберг

Фэйсбүүк компанийг үндэслэгчдийн нэг 34 настай Марк Цүкербергийн хөрөнгийн хэмжээ 61 тэрбум доллартай тэнцдэг. 

5. Ларри Эллисон

Оракл корпорацийг үндэслэгчдийн нэг Ларри Эллисон өдгөө 74 настай бөгөөд түүний хөрөнгийн хэмжээ 58,4 тэрбум доллар аж. 

6. Ларри Пэйж 

Google хайлтын системийг үндэслэгчдийн нэг 45 настай Ларри Пэйж сод ухааныхаа ачаар өдгөө 53,8 тэрбум долларын хөрөнгийн эзэн болжээ. 

7. Чарльз Кох, Дэвид Кох

Koch Industries компанийг үндэслэгч ах, дүү хоёр өдгөө 82, 78 настай бөгөөд хөрөнгийн хэмжээ нь 53,5 тэрбум доллараар үнэлэгдэж байна. Өмнө нь тэд эрчим хүчний салбарт хөрөнгө оруулж байсан бол өдгөө түүхий эдийг үнэтэй эцсийн бүтээгдэхүүн болгоход гол анхаарлаа хандуулжээ. Ах, дүү хоёр газрын тос боловсруулалт, бордоо үйлдвэрлэл, полимер хийх, ойн салбар, өргөн хэрэглээний бараа үйлдвэрлэл зэрэгт хөрөнгө оруулалт хийдэг. Улс төрийн амьдралд идэвхтэй оролцдог бөгөөд тодорхой улс төрийн намууд, улс төрчдийг санхүүжүүлдэг. Ийм учраас ихээхэн шүүмжлэлд өртдөг билээ. 

9. Сергей Брин

Google хайлтын системийг боловсруулагч, үндэслэгчдийн нэг 45 настай Сергей Брины хөрөнгийн хэмжээ 52,4 тэрбум доллараар үнэлэгджээ.  

10. Майкл Блүүмберг

Блүүмберг компанийг үндэслэгч 76 настай Майкл Блүүмберг Нью-Йорк хотын захирагчаар ажиллаж байсан гэдгийг бид мэднэ. Блүүмбергийн эзэнт гүрэнд телевизийн сувгууд, радиостанцууд, санхүүгийн мэдээллийг дамжуулдаг дэлхийг хамарсан компьютер сүлжээ багтдаг. Компанийн ажилтнуудын тоо дэлхийн 130 улсад 9500-д хүрчээ. Блүүмбергийн мэдээг тогтмол үздэг хүмүүс олон саяараа байдаг. Нью-Йорк хотын захирагч байхдаа жилийн нэг долларын цалин авч байсан бөгөөд төсвөөс ямар ч хангамж авч байсангүй. Түүний хөрөнгийн хэмжээ 51,8 тэрбум доллар. 
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна