Талийгаач эцгийнхээ сүнсийг хооллож төрлийг нь олуулжээ
2018 оны 10 сарын 27
Хоол хүнсийг зөвхөн амьд организм л хэрэглэдэг гэж бид ойлгодог. Хүн болоод адгуусан, цаашлаад нэг эст амьтад болох амёб, шаахай хүртэл хооллоно. Мөн ургамлын аймаг ус болоод нүүрстөрөгчөөр тэтгэгдэж амьдардаг. Мэдээж үхэж мөхсөн амьд биетүүд хооллохгүй нь тодорхой. Харин сүнс хооллодог гэвэл уншигч авхай та үнэмших үү? Тэгвэл энэ асуултанд таны өмнөөс хариулахын тулд итгэхэд бэрх, үнэмшихэд хэцүү ч гэрч нь яалт ч үгүй амьд байгаа нэгэн явдлыг өгүүлсү. 

Өнгөрөгч жил миний бие нэгэн тохиолдлоор Налайх дүүрэгт амьдардаг насаараа их уурхайд бэхэлгээчин хийсэн Г гэдэг хүнтэй танилцсан билээ. Бид маш олон зүйлийг ярилцсан авч түүний дотроос нийтлэлийн эхэнд дурьдагдсан сүнс хооллодог тухай яриа нь өөрийн эрхгүй анхаарал татсан юм. 2002 оны 7 сарын эхээр Гийн аав Д гуай 75 насныхаа сүүдэр дээр бурхан болжээ. Тэгэхдээ монголчуудад элбэг тохиолддог өвчин болох улаан хоолойн хорт хавдар буюу нарийнтах өвчнөөр өвчилсний улмаас хоол, цай, тэр ч бүү хэл ганц дусал сүү ч орохоо больж нэг үгээр хэлбэл өлсөж өнгөрсөн аж. Хүний амь гэдэг үнэхээр бөх гэнэ. Сүүлдээ зөвхөн уруул дээр нь самбай норгож тавиад байхад л бараг долоо хоног шахам амьд байжээ. 

Өвгөн ч өнгөрч ажил явдал нь тэр дороо бүтсээр оршуулав. Харин оршуулсаных нь маргааш шөнө Гийн зүүдэнд талийгаач болсон аав нь орж ирэх нь тэр. Г минь, аавдаа хоол өгөөч хэмээн нэхэж байх юм гэнэ. Тэгээд л сэржээ. Г бас ч гэж учир мэдэх хүний хувиар маргааш өглөөнөөс нь эхлээд аавынхаа зургийн өмнө цай, хоолныхоо дээж, тавагтай идээ засав. Гэтэл дараагийн шөнө нь аав нь зүүдэнд нь дахин орж ирсэн төдийгүй "Би чиний өгсөн хоолыг чинь идэж чадахгүй байна. Намайг хар л даа" гэх нь тэр. 

Үнэхээр ч аав нь цүрдийсэн гэдэстэй хэрнээ утас шиг нарийхан хүзүүтэй харагдаж байх юм гэнэ. Энэ явдал хэдэн шөнө энэ маягаар давтагдав. Эцэс сүүлд нь энэ явдал нэг л жир бус гэдэг нь анзаарагдахад лам хараас асууж гүрэм дором хийлгээд ч тусыг эс олжээ. Гэтэл жор мэддэггүй ламаас зовлон үзсэн чавганц дээр гэгчийн үлгэрээр Должин гэдэг 80 хол гарсан эмгэн. 
Г минь, сүнс сүрээр хооллодог гэж урьд биднийг бага байхад ярьдаг байсан. Сүр гэдэг нь үнэр юм шүү дээ. Тэгэхлээр чи ямар ч байсан орой болгон аргалын цог дээр арвайн гурил уугиул. Ямар ч байсан нэг туршаад үз дээ гэж зөвлөжээ. Цөхрөнгөө барсан хүнд үүн шиг үнэтэй зөвлөгөө гэж хаана байхав. 

Тэр оройдоо л Должин эмгэний зааврын дагуу бүх зүйлийг ёсчлон гүйцэтгэжээ. Гэвч шөнө аав нь зүүдэнд ахиад л ороод ирэх нь тэр. Гэхдээ энэ удаад арай л өөрөөр иржээ. Аав нь "Баярлалаа, хүү минь. Чи ямартаа ч 49 хоног намайг хоолло. Тэгвэл би төрлөө олох юм шиг байна" гэж хэлэх юм гэнэ. 

Тэгээд зүүд болоод зөн совиндоо итгэн 49 хоног сүр хийж эцгийнхээ сүнсийг хоолложээ. 48 дахь хоногийнх нь шөнө аав нь ахиад л зүүдэнд нь орж ирлээ. Тэгэхдээ мөнөөхөн цүрдгэр гэдэс, утас шиг нарийхан хоолой нь ор тас алга болон төрөл арилжсан мэт өөрчлөгдөөд махтай шөлтэй, өвчлөхөөсөө өмнөх төрхөндөө орчихсон байх юм гэнэ. Тэгээд "Баярлалаа. Би хойд төрлөө олох нээ. Танай хүүгийн чинь гэрт төрөх болно" гэж хэлэхэд нь сэрээд харахад усны уур шиг тунарсан цагаан юм цонхоор тамхины утаа сорогдох мэт гарч оджээ. Тэр цагаас хойш эцгийнх нь сүнс эргэж хургаж зовоогоогүй гэнэ. Ийн сүнс хооллодог тухай анх сонсож байгаа нь энэ. 
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна