Беларусаас 50 сая евро зээлнэ
2018 оны 12 сарын 6
Энэ өдрүүдэд УИХ-ын байнгын хорооны түвшинд Монгол улсын Засгийн газар, Бүгд Найрамдах Беларусь улсын Засгийн газар хооронд байгуулах “Экспортын зээлийн ерөнхий хэлэлцээр”-ийн төслийг хэлэлцэхээр бэлтгэж байна. Өнгөрсөн долоо хоногт уг асуудлыг Эдийн засгийн байнгын хорооны хуралдаанаар хэлэлцэхээр товлосон ч Засгийн газрыг огцруулах асуудлаар бойкот зарласан гишүүд хуралдаа суугаагүй учир ирц бүрдээгүй гэх шалтгаанаар асуудлыг хэлэлцэхийг хойшлуулсан.

Энэ долоо хоногт мөн уг асуудлыг хэлэлцэхээр товлосон ч Эдийн засгийн байнгын хорооноос санал дүгнэлтээ ирүүлээгүй гэх шалтгаанаар дахин хойшлууллаа.

Манай улсын Засгийн газар, Бүгд найрамдах Беларусь улсын Засгийн газар хооронд 50 сая еврогийн “Экспортын зээлийн ерөнхий хэлэлцээр”-ийг байгуулахаар төслийг хамтран боловсруулаад байгаа. Тодруулбал,  манай  улс Беларусь улсаас 50 сая еврогийн зээлийг авна гэсэн үг юм. Уг зээлийн нөхцөл нь жилийн 0.78-1.9 хувийн хүүтэй, эргэн төлөгдөх хугацаа нь долоон жил, үүнээс зээлийн үндсэн төлбөрөөс чөлөөлөгдөх хугацаа нь хоёр жил юм байна. Зээлийн хүүгийн хувьд УИХ-аас зөвшөөрөл авч, хэлэлцээрийг батлагдах үеийн хувь хэмжээнээс хамаарч тогтоох аж.

ОУВС-ийн аргачлалаар энэхүү зээлийн хөнгөлөлтийн түвшин 17.42 хувь бөгөөд Монгол улсын өрийн удирдлагын тухай хуулиар хөнгөлөлттэй зээлийн ангилалд хамаарч байгаа. Уг зээлийг авснаар Засгийн газрын өр нэмэгдэнэ гэдгийг зарим УИХ-ын гишүүд хэлж байгаа юм.

Зээлийн хэлэлцээрийн хүрээнд хэрэгжүүлэх төслийг хоёр улсын Засгийн газар тохиролцох бөгөөд эхний ээлжинд ОБЕГ-т гал унтраах машин, тоног төхөөрөмжийг нийлүүлэхээр төлөвлөж байна. Түүнчлэн Улаанбаатар дахь хуучны орон сууцууд Беларусь улсад үйлдвэрлэсэн цахилгаан шат хэрэглэдэг бөгөөд эдгээрийг шинэчлэх шаардлага үүссэн тул дээрх хэлэлцээрийн хүрээнд энэ чиглэлээр хамтран ажиллаж болно гэдэг саналыг манай талаас тавьсан байна.Энэ мэт нэн даруй хийж, хэрэгжүүлэх шаардлагатай ажилд уг зээлийн мөнгийг зарцуулах аж.

Харин зарим гишүүд гадны зээлийг эдийн засгийн эргэлтэд оруулах, иргэдийг ажлын байртай орлоготой болгох, орон нутагт ажлын байр бий болгоход түлхүү чиглүүлэх нь зүйтэй гэдэг байр суурийг илэрхийлж байгаа  юм. Мөн зээлийн эргэн төлөгдөх хугацааг 28-30 жил болгох шаардлагатай гэж зарим гишүүд үзэж байна. Учир нь 2021 оноос Мазаалай бондын 500 сая, 2022 онд Чингис бондын нэг тэрбум, 2023 он Гэрэгэ 800 сая ам.долларын өрийг төлнө. Энэ мэт 2020 оноос маш олон бондын эргэн төлөлт эхлэх учраас уг зээлийн төлөх хугацааг уртасгах зайлшгүй шаардлагатай гэж үзэх мэргэжилтнүүд ярьж байна.
Эх сурвалж: medee.mn
Эх сурвалж www.wikimon.mn
Т.Хулантахь
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
У.Хүрэлсүхийн Засгийн газрын үйл ажиллагаанд та сэтгэл хангалуун байна уу?
  • Тийм
  • Дунд зэрэг
  • Явцгүй байна