Нохойных нь оосор урт байна гэж 80 настай хөгшнийг торгожээ
2019 оны 1 сарын 8

Мэрсисайдын Бүүтл хотын оршин суугч Маурин Сандерсийг нохойгоо салхилуулан оршуулгын газрын ойролцоо явж байхад нь цагдаа нар 50 фунт стерлингээр торгосон байна. Түүнийг Сорен нэртэй нохойтойгоо зугаалж явахад нь цагдаагийн хоёр офицер ирээд нохойн оосор хоёр метрээс урт байх ёсгүй гэдэг дүрмийг зөрчсөн хэмээн торгууль бичээд явсан гэнэ. Ямар ч анхааруулга, тайлбаргүй энэхүү гэнэтийн торгуульд хөөрхий эмэгтэйг мэл гайхаж орхижээ. Оршуулгын газрын гаднах анхааруулга дээр нохойн оосор богино байх ёстой гэж заасан ч зөвшөөрөгдөх хэмжээг нь тодорхой бичээгүй байжээ. 

Хэдийгээр охид нь ээжийнхээ торгуулийг төлөхийг зөвшөөрсөн ч тэтгэврийн хөгшин үүнийг хүлээн зөвшөөрөхгүй байгаа гэнэ. Тэрээр “Би ийм дүрэм байдгийг мэдэхгүй юм байна. Намайг хамгийн ихээр гонсойлгосон зүйл бол хэрвээ би хоёр долоо хоногийн дотор 50 фунтийн торгуулийг төлөхгүй бол энэ хэмжээ өсөж 2500 фунт болохын зэрэгцээ надад хэрэг үүсгэх болно гэсэн. Би маш их сэтгэлээр унаж, бүхэл шөнөжингөө уйлсан” хэмээжээ. 

Маурин гурван жилийн өмнө амьтдын эрхийн төлөө тэмцэж байхдаа Сорен нохойгоо Румынээс авчирч тэжээх болжээ. Түүний нохой найрсаг хэдий ч бусад ноходтой таарамж муутай байдаг тул тэрээр нохойгоо байнга оосорлож явдаг аж. “Надад компьютер зэрэг төхөөрөмж байхгүй болохоор би элдэв тогтоол шийдвэрүүдийг мэдэх боломжгүй. Би оршуулгын газар үргэлж хүндэтгэлтэй хандсаар ирсэн. Нохойгоо байнга оосорлож авч явдаг, гэтэл олон хүмүүс над шиг байдаггүй шүү дээ” хэмээн настай эмэгтэй гомдолложээ. 

Түүний охин Мэгги Ийтон ээжийнх нь хараа муудсанаас болж анхааруулгыг олж хараагүйн дээр алхахад хэцүү байдаг тул нохойндоо урт оосор ашигладаг гэсэн байна. Мөн тэрээр ээж нь торгуулсныхаа дараа маш их уйлсан гэжээ. Мэгги “Эгч бид хоёр торгуулийн мөнгийг төлөхийг зөвшөөрсөн ч ээж эрс татгалзсан. Учир нь тэрээр юуг ч буруу хийгээгүй гэж үзэж байгаа. Тэр юу ч төлөхгүй гэсэн” хэмээсэн юм. Учир явдлыг ойлгосон хотын удирдлагууд түүнд оноосон торгуулийг хүчингүй болгосон байна.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Дэргэдээ дадлагажих эмнэлэггүй хувийн 16 анагаах ухааны дээд сургуулийг аттестатчлалд оруулах хэрэгтэй юу?
  • Яаралтай оруулах хэрэгтэй
  • Хэрэггүй
  • Мэдэхгүй