Ж.Батбаясгалан: Сайжруулсан түлшний үйлдвэрлэлийн горимд хяналт тавих хэрэгтэй
2019 оны 2 сарын 11
Засгийн газраас ирэх тавдугаар сарын 15-наас эхлэн Улаанбаатар хотод түүхий нүүрс оруулахыг хориглох шийдвэр гаргасан. Ингэснээр нийслэлийн гэр хорооллын 200 гаруй мянган өрх боловсруулсан түлш хэрэглэх юм. Агаарын бохирдлыг бууруулах чиглэлд энэ онд нийслэлээс ямар ажил хийх талаар Нийслэлийн Засаг даргын үүргийг түр орлон гүйцэтгэгч Ж.Батбаясгалангаас тодрууллаа.

-Агаарын бохирдлыг бууруулах чиглэлээр нийслэлд энэ онд ямар ямар ажил хийгдэг вэ?

-Засгийн газар агаар орчны бохирдлыг бууруулах үндэсний хөтөлбөрийг баталсан. Энэ хүрээнд УИХ-аас гарсан ажлын хэсгийн гаргасан шийдвэр бүгд туссан. Хамгийн гол нь хөрөнгө мөнгө зохион байгуулалтын ажил л үлдэж байгаа. Засгийн газраас баталсан агаар орчны бохирдлыг бууруулах үндэсний хөтөлбөр хоёр шаттай. Энэ хөтөлбөрийг 2025 онд бүрэн хэрэгжүүлж дуустал 8.9 их наяд төгрөг хэрэгтэй байгаа. 2015 онд Цэвэр агаар сангаа татан буулгаснаас хойш агаарын бохирдлыг бууруулах ажилд нэг ч төгрөг тавиагүй. Агаарын бохирдол ярьдаг нэг ч хүн байгаагүй. Харин 2018 онд Засгийн газрын тусгай сангийн хуульд өөрчлөлт оруулаад агаар орчны бохирдлын эх үүсвэрээс ордог дөрвөн төрлийн татвар хураамжийн орлогыг агаарын бохирдлыг бууруулахад зарцуулах шийдвэр гаргасан. Бид баталсан хөрөнгө мөнгөндөө тааруулаад ажлаа хийх л үлдсэн. Хөрөнгө мөнгөгүй, сэтгэл гаргаад ажлаа хий гэж байна. Батлагдсан төсвийн хүрээнд л төрийн ажил явна шүү дээ. 

-Энэ жил агаарын бохирдлыг бууруулахад нийслэлд хэдий хэмжээний санхүүжилт тусгасан бэ?

-Монгол Улсын 2019 оны төсөвт 75.2 тэрбум төгрөгийг орчны бохирдлыг бууруулахад баталсан бол нийслэлд 3.8 тэрбум төгрөг баталсан. Энэ хүрээнд л үндэсний хөтөлбөрөө хэрэгжүүлэн ажиллана.

-Энэ оны тавдугаар сараас нийслэлд түүхий нүүрс оруулж ирэхийг хориглосон. Гэтэл боловсруулсан түлшээр нийслэлийн айлуудыг бүрэн хангаж чадахгүй гэсэн мэдээлэл гараад байгаа?

-Улаанбаатар  хотын гэр хорооллын 200 гаруй мянган өрх жилдээ 800 орчим мянган тонн түүхий нүүрс хэрэглэж байгаа. Тэгэхээр сайжруулсан түлшний хэрэглээ, техник үзүүлэлтийг нь харахаар 30-40 хувиар хэрэглээ нь буурна. Тиймээс энэ жил 600 мянган тонно сайжруулсан түлш үйлдвэрлэх зорилт тавьж байна. 450 мянган тонн сайжруулсан түлшийг төрийн өмчит компани, 150 орчим мянган тонныг хувийн хэвшил үйлдвэрлэх юм. Тавантолгой түлш компанийн хүчин чадлыг 3-4 дахин нэмэгдүүлэх зорилт тавин ажиллаж байна. Түүхий нүүрсний хэрэглээг хориглоход оронд нь сайжруулсан түлш хэрэглэнэ. Тиймээс иргэдэд таниулах хамгийн чухал.

-Сайжруулсан түлшний үнийг хэрхэн тооцож байгаа вэ. Түүхий нүүрснээс үнэтэй бол иргэд түүхий нүүрсээ сонгож түлэх магадлал байгаа?

-Ерөнхий сайд өнөөдрийн зах зээлд байгаа түүхий нүүрсний үнээс хэтрэхгүй байх чиглэл өгсөн. Боломж гарвал хямдруулах ч чиглэл байгаа. Улаанбаатар хотын иргэдийн 60 хувь нь гэр хороололд амьдарч байна.

-Сайжруулсан түлш эрүүл мэндийн хувьд ямар нэгэн нөлөө байгаа юу. Зарим эрдэмтэд утаа буурах боловч агаарт ялгарах нүүрс хүчлийн хий их гарах учраас хор нь илүү байх магадлалтай гэсэн байр суурь йилэрхийлсэн байсан?

-Монгол Улсын хүчин төгөлдөр мөрдөгдөж байгаа хууль тогтоомжоор батлагдсан стандартыг л мөрдөж ажиллах ёстой. Бид түлш хэрэглэж байгаа ард иргэдийг хянахаасаа илүү үйлдвэрлэлийн горимд алдаа гарах вий гэдгийг хянах ёстой. Нэг удаа угаагдсан түүхий эдгээр сайжруулсан түлш хийж байгаа. Үүнийг барьцалдуулагч бодисоор барьцалдуулж байгаа. Үүнд хэрвээ горимын алдаа гарвал түүхий нүүрснээс ч хортой байх аюултай.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй