Б.Ганхуяг: 1072 хувьцааны ногдол ашиг тараах тооцоо гараагүй
2019 оны 2 сарын 12
"Эрдэнэс-Тавантолгой–Инноваци, Үйлдвэрлэл" зөвлөгөөн Туушинд зочид буудалд болж байна. Энэ зөвлөгөөнөөр Эрдэнэс Тавантолгойн үйл ажиллагаа болон цаашид ямар инновациар хэрхэн үйлдвэрлэл явуулах талаар хэлэлцэж байна. Зөвлөгөөнд Засгийн газрын хэрэг эрхлэх газрын дарга Л.Оюун-Эрдэнэ, Эрдэнэс Тавантолгой компанийн удирдлага, эрдэмтэн судлаачид оролцож байна. Зөвлөгөөнд нийт 11 илтгэлийг хэлэлцэх аж.

Зөвлөгөөний үеэр Эрдэнэс Тавантолгой ХК-ийн гүйцэтгэх захирал Б.Ганхуягаас зарим зүйлийг тодрууллаа.

-Эрдэмтэн, судлаачдын зөвлөгөөнөөс юу хүлээж байгаа вэ. Ямар зорилготой арга хэмжээ вэ?
Инноваци эцсийн бүтээгдэхүүн болох, нэмүү өртөг шингэх гэдэг бол манай компанийн бизнесийн эцсийн том зорилго мөн. Энэ зорилгодоо өдөр тутмын үйл ажиллагаагаа чиглүүлж ажиллаж байгаа.

2011, 2012 онд зүүн, баруун уурхайг олборлох ТЭЗҮ батлагдсан. Энэ ТЭЗҮ-ийн хүрээнд нүүрс баяжуулах үйлдвэр, төмөр зам, автозам, цаашлаад хими технологийн үйлдвэр, усан хангамжийн асуудлыг өндөр түвшинд төлөвлөгдсөн. Энэ ажлууд үргэлжилж байгаа. Бидний хийж байгаа бизнес, олон улсын зах зээлээс хөрөнгө босгох ажлын ард эрдэмтэн, судлаачид, шинжээчид ажиллаж байгаа. Үүний нэг илрэл нь өнөөдрийн эрдэмтдийн зөвлөгөөн юм.

-1072 хувьцааг эдийн засгийн эргэлтэд оруулах ажил ямар шатанд яваа вэ?
-Эрх бүхий байгууллага 50 хоногт шийдвэрлэх хуультай. Энэ хүрээнд Засгийн газрын түвшинд яригдсан асуудал байгаа. Тодорхой тоо баримттай мэдээллийг Засгийн газарт өгсөн. Аудитлагдсан тайлан гарах ёстой. Үүний дараа ТУЗ-өөс шийдвэр гарна. Энэ шийдвэрийг хувьцаа эзэмшигчдийн хуралд танилцуулдаг үүрэгтэй. Энэ процессын дагуу явагдаж байгаа. Компани одоо үндэсний аудитын байгууллагад тайлангаа өгөөд аудитын ажил үе шаттай явагдаж байна.

-Иргэдэд 20-30 мянган төгрөгийн ногдол ашиг тараана гэсэн мэдээлэл байсан?
-Компанийн хувьцааны нэгж хувьцааны үнэ аудитын тайлан гарсны дараа ТУЗ-ийн шийдэх асуудал. Эцсийн тооцоо гараагүй байна.
Компани ашигтай ажиллах үүрэгтэй. Эрдэнэс Тавантолгой ХК 2010 оноос хойш хасах баланстайгаар үйл ажиллагаагаа эхэлж, 2016 он хүртэл ашиггүй ажилласан. 2017 онд 410 тэрбум төгрөг, 2018 онд 700 гаруй тэрбум төгрөгийн цэвэр ашигтай ажилласан. Ашигтай ажилласан л бол компани үр дүнгээ өгч байх ёстой. Ямар хэмжээний ногдол ашиг тараах асуудал ТУЗ дээр тооцоог хийгдээд, ажил үргэлжилж байна.

-Ногдол ашгийн талаар ТУЗ-өөс ямар ч шийдвэр гараагүй гэсэн үг үү?
-Давуу эрхийн хувьцаа болон 1072 хувьцааны талаар яригдсан. Эрдэнэс Монгол дээр байгаа 3 сая хувьцаа бол давуу эрхийн хувьцаа. Мөн 1072 хувьцаа эзэмшигч 2 511 000 иргэний асуудал байгаа. Хуулийн хүрээнд иргэн ямар эрх эдлэх ёстой тэр эрхийг эдлүүлэх чиглэлээр эрчимтэй ажиллаж байна.

Эх сурвалж www.wikimon.mn
М.Болд
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
УИХ тарах ёстой юу?
  • Нэн даруй тарах ёстой.
  • Тарах шаардлагагүй
  • Тарлаа гээд юу ч өөрчлөгдөхгүй