Шалгалтад бүдэрсэн нийтийн байрны эзэн ташаа мэдээлэл тараажээ
2019 оны 3 сарын 12
Баянгол дүүргийн нутагт байрлах нийтийн байруудад энэ сарын 1-нд холбогдох албаны хүмүүс хяналт, шалгалтыг зохион байгуулсан. Энэ үеэр өрөө түрээслэгч  бага насны хүүхдээ тэвэрсэн эмэгтэйн дэргэд мэргэжлийн хяналтын байцаагч хөглөрсөн өрөөнд зогсож буй зураг цахим сүлжээнд олны анхааралд өртөж багагүй шүүмжлэл дагуулав.

Уг зургийн дор “удахгүй та бидний гэрт дайраад орж ирнэ. Ардчилсан нийгэм хаана байна”, “Ядаж хүүхдийг нь бодож болсонгүй юу” гэх сэтгэгдлүүд ар араасаа хөвөрч байв. Энэ талаар Нийслэлийн мэргэжлийн хяналтын газраас цахим сүлжээнд нийтлэгдсэн зураг бодит байдлаасаа өөр нөхцөл байдалд байсныг тайлбарлалаа. Тодруулбал, нийтийн байруудад гэмт хэрэг, зөрчил гарах нөхцөл бүрдэж байна гэж Баянгол дүүргийн Засаг дарга С.Одонтуяа болон бусад холбогдох албаны хүмүүс үзсэн тул нутаг дэвсгэрт байрлах нийтийн байруудад урьдчилан сэргийлэх хяналт шалгалтын ажлыг зохион байгуулжээ.

Тус дүүргийн Засаг даргын захирамжийн дагуу харьяа Цагдаагийн хоёрдугаар хэлтэс болон Онцгой байдлын хэлтсээс мэргэжлийн хяналтын байгууллагатай хамтран ажлын бус шөнийн цагаар 55 нийтийн байрт шалгалт хийжээ. Шалгалтын явцад гэмт хэргийн шинжтэй нөхцөл байдал угтсан газар нь дээрх зураг байсан гэж НМХЕГ-ын Олон нийттэй харилцах мэргэжилтэн Ч.Даариймаа хэллээ. Тэрбээр “Мэргэжлийн хяналтын ерөнхий газар болон Нийслэлийн мэргэжлийн хяналтын ерөнхий газраас Баянгол дүүргийн нутагт байрлах нийтийн байруудад дээрх хяналт шалгалтыг хийгээгүй. Тус дүүрэг дэх Мэргэжлийн хяналтын газраас Цагдаагийн хоёрдугаар хэлтэс, Онцгой байдлын хэлтэстэй хамтран хяналтын ажлыг зохион байгуулсан. Өөрөөр хэлбэл, Баянгол дүүргийн харьяа холбогдох газрууд хамтран гэмт хэргээс урьдчилан сэргийлэх хяналт шалгалтын ажлыг гүйцэтгэсэн. 

Нийтийн байруудад шалгалт хийх явцад хэд хэдэн зөрчил илэрсний нэг нь  архидан согтуурч, агсам тавьсан нөхцөл байдал угтсан. Хашаандаа 10 айл түрээслүүлдэг нийтийн байрны эзэн нь согтуу байсан. Өрөө түрээслэгч эмэгтэй архидан согтуурч, хүүхэд нь уйлж, өрөө нь хөглөрсөн байдалтай мэргэжлийн хяналтын улсын байцаагч таарсан. Тухайн үед орчны агаар, чийгт хэмжилт хийж байсан нь олон нийтэд буруугаар ойлгогдоод байна. Үүссэн нөхцөл байдалтай цагдаагийн хоёрдугаар хэлтсийн алба хаагчид танилцаж, согтуурсан иргэн эрүүлжүүлэгдэх хэмжээнд байна гэж үзэн нийтийн байрны түрээслүүлэгч эзнийг эрүүлжүүлэх рүү авч явсан. Харин согтуурсан эмэгтэйн хүүхэд нь уйлж байсныг мэргэжлийн хяналтын улсын байцаагч аргадан саатуулж, бас холбогдох албаны хүмүүс эмэгтэйг хүүхэдтэй нь үлдээсэн юм билээ. 

Энэ дүр зургийг олон нийт буруугаар ойлгож асуудал үүслээ. Нийслэлийн мэргэжлийн хяналтын газар Засгийн газрын 177 дугаар тогтоолын дагуу нийтийн байруудад хяналт шалгалтыг хийдэггүй. Хашаандаа байшин барьсан айл бүрийг мэргэжлийн хяналтын газраас шалгадаггүйтэй л адил. Олон нийт  цахим орчинд хүмүүс аливаа зүйлийн учрыг олж, олон талаас харж бодох хэрэгтэй. Гэтэл зурагтай нь хамт буруу ташаа мэдээлэл түгээсэн хүн нь Эрүүлжүүлэх байранд саатуулагдсан байрны эзэн болох нь тогтоогдсон” гэлээ.

Шалгалтаар тухайн байрнууд төвлөрсөн шугамд холбогдоогүй зөөврийн устай, бие засах газар нь гаднаа, нүхэн жорлонтой, байрнуудад физик хэмжилт хийхэд өрөөнүүдийн температур 20-22, чийглэг 30-40 градус байсан аж. Эдгээр зөрчлийг холбогдох эзэнд танилцуулж, арга хэмжээ авахыг үүрэг болгосон аж.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Дэргэдээ дадлагажих эмнэлэггүй хувийн 16 анагаах ухааны дээд сургуулийг аттестатчлалд оруулах хэрэгтэй юу?
  • Яаралтай оруулах хэрэгтэй
  • Хэрэггүй
  • Мэдэхгүй