Сард 500 монгол хүн эх орноосоо ”дүрвэж” байна
2019 оны 3 сарын 13
Үндэсний статистикийн хорооноос дундаж цалин 1,1 саяд хүрсэн тухай мэдээллийг өчигдөр хийлээ. Энэ бодит тоо юу? Цахим орчинд иргэд энэ тоонд эргэлзэж байгаагаа бичиж байна. Хэрэв Монголчууд бидний дундаж цалин энэ хэмжээнд байгаа бол яагаад эх орон, гэр бүл хамаг байдгаа орхин харийн орон руу боолын хөдөлмөр эрхлэхээр өдөр шөнөгүй цувна вэ? Монгол Улсын гурван иргэн тутмын нэг нь гадаадын аль нэг улсад гарч хөдөлмөр эрхлэх хүсэлтэй гээд хэлчихвэл буруудахгүй. Үүнийг дараах тоо баримтаас харж болно.

БНСУ-аас Монгол Улсад суугаа элчин сайдын яамнаас өнгөрсөн сарын сүүлд нэгэн мэдэгдэлд “БНСУ-ын элчин сайдын яаманд виз мэдүүлж буй иргэдийн тоо өдөрт дунджаар 700-800 орчим байгаа бөгөөд мөн үүнийг даган Солонгос улсын хилээр нэвтэрсэн иргэд дунд сар бүр дунджаар 500 орчим иргэн хууль бусаар оршин суухаар үлдэж байгаатай холбогдуулан визний материалыг илүү нарийвчлан шалгах шаардлага тулгарч байна. Цаашид виз мэдүүлж буй Монгол иргэдийн материалыг хамгийн багадаа 50 өдөр (ажлын өдөр, 10 долоо хоног) болон түүнээс дээш хугацаа зарцуулан шалгах болно” гэжээ. Элчин сайдын яамныхан эдгээр визний материалыг шалгахаар илүү цагаар ажиллаад ч ачааллаа дийлэхгүй байгаагаа үүгээр мэдэгдсэн байна.

Иймээс виз гарах хугацааг сунжирч байгааг албан ёсоор мэдэгдсэн нь энэ. Ийнхүү элчин сайдын яамны ажилтнуудыг илүү цагаар ажиллах хүртэл нь Солонгос улсын зорих хүсэлтэй Монгол иргэд материалаа хүргүүлжээ. Эх орондоо хангалттай хэмжээнд хөдөлмөрөө үнэлүүлдэг бол тэд хайртай бүхнээ орхин харийн орныг зорих байсан уу? Статистик тоо баримтад бидний цалин өдрөөс өдөрт нэмэгдсээр байгаа тухай дурьдсан ч энэ бол зүгээр л цаасан дээрх тоо юм. Бодит бус. Харин бодитоор боломжийн цалинг монголчууд гадны улсуудад очиж авдаг. Ийм л учраас Монголчууд Солонгост ажиллаж, аж амьдралаа дээшлүүлэх хүсэлтэй болоод олон оныг үдэж байна. Саяхан нэгэн залуу Солонгост найм хоног ажиллаад монгол мөнгөөр хоёр сая гаруй төгрөгийн цалин авсан тухайгаа цахим хуудаснаа бичиж. Энэ бол монголчууд бид эх орондоо дөрвөн сар ажиллаад татвараа төлөөд гар дээрээ авах мөнгө юм. Ялгаа нь ердөө л энэ.

Солонгост Монголчууд өдрийн 80-200 вонноор хөдөлмөрөө үнэлүүлдэг. Иймээс л өдөр бүр зуу зуугаараа Солонгосын элчин сайдын яамнаас ирэх хариуг хүлээн, утсаа чагнан өнжиж байна. Харин виз гарсан “баярт мэдээ”-г хүлээн авч Солонгос улсын хилийг давсан бол ихэнх нь “хараар” ажиллах замыг сонгон, тэндээ үлддэг. Албаны тоогоор сард 500 монгол иргэн эх орноосоо “дүрвэж” байгааг дахин тодотгоё. Жилд 6000 мянган иргэн хайртай бүхэндээ хэзээ очихоо мэдэхгүй боолын хөдөлмөр эрхэлж байна гэсэн үг. Дайн дажин, үймээн самуунтай орнуудад л ард иргэд нь ингэж олноороо эх орноо орхин дүрвэдэг байлтай. Гэтэл энх тунх хэдий ч эдийн засгийн эрхшээлд орсон монголчууд ар гэрээ, хайртай хүмүүстээ идэж ууж, өмсөж зүүж, сурч, амьдрах тухтай орчин бүрдүүлж өгөхийн төлөө мянга мянгаараа эх орноо орхин гарсаар байна. Энэ нь эргээд Монголын тусгаар тогтнол, аюулгүй байдалд маш хортой нөлөө үзүүлнэ гэдгийг захын хүн мэдэж байгаа ч эх оронч үзэл гаргаад элгэн саднаа элгээр нь мөлхүүлэлтэй биш гэж харийн хүнийг царайчлахаар өөрийгөө зольж байна. Монголчууд бид хэзээ эх орондоо хангалттай хэмжээнд хөдөлмөрөө үнэлүүлж, хайртай бүхэнтэйгээ элэг бүтэн амьдрах вэ? гэдэг асуулт хариулт нэхсээр байна.
 
Эх сурвалж: Оллоо.мн

Эх сурвалж www.wikimon.mn
П.АНИР
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
”Эрдэнэт”-ийн 49 хувийг төр буцааж авах нь зөв үү?
  • Зөв
  • Буруу
  • Мэдэхгүй