“Эрдэнэт” үйлдвэртэй холбогдох Ц.Элбэгдоржийн түүх
2019 оны 3 сарын 15
Монгол улсын 4 дэх Ерөнхийлөгч Ц.Элбэгдорж Монголыг тэжээж ирсэн ганц “саалийн үнээ” “Эрдэнэт” үйлдвэртэй ашиг сонирхлын асар их холбоотой нэгэн.

Тэрбээр бүр 1981-1982 онд “Эрдэнэт” үйлдвэрт ачигч, машинч, засварчин хийж явсан гэдэг. Мэдээж эрх мэдэлд байсан сүүлийн 20 гаруй жилдээ тус үйлдвэрийн хувь заяанд оролцож ирсэн байдаг юм.

Жишээ өгүүлье.

1998 оны хавар М.Энхсайханыг Ерөнхий сайдаас огцруулж, Ц.Элбэгдоржийн удирдсан Засгийн газар гарч ирсэн ч гурван сар болоод огцорч байв.Улмаар таван сар үүрэг гүйцэтгэж байхдаа 1998 онд “Эрдэнэт” үйлдвэрийн захирал агсан Ш.Отгонбилэгийг албан тушаалаас нь чөлөөлж, тухайн үеийн ТӨХ-ны дарга асан Одхүүгээр хаалгыг нь эвдүүлж орж байсан түүхтэй. Мөн “Эрдэнэт”-ийг Ш.Отгонбилэг нар идсэн,уусан гэх асуудлаар “Зууны луйвар” нэртэй нэвтрүүлэг хийлгэн цацуулж байв. Шо агсныг буулгаад оронд нь “Эрдэнэт”-ийн захирлаар томилсон хүн нь Д.Дорлигжав.

Д.Дорлигжав нь Ц.Элбэгдоржийг Ерөнхий сайд, Ерөнхийлөгч болох бүрт хамгийн том албан тушаалуудад томилогдож ирсэн нэгэн. Тэрбээр тус үйлдвэрийн захирал байхдаа 800 мянган ам.долларын хэрэгт холбогдон халагдсан билээ. Ц.Элбэгдоржийн дараа “АХ” эвслээс Ж.Наранцацралт Ерөнхий сайд болсон бөгөөд 250 мянган ам.доллараар “Эрдэнэт”-ийн 49 хувийг Оросын хувийн компанид өгөх гэсэн хэргээр огцруулсан.Харин тэр хэрэг явдалд Ц.Элбэгдоржийн гар хөл орсон гэлцдэг. Учир нь Ц.Элбэгдорж Ерөнхий сайд байхдаа буюу 1998 онд л 49 хувийг Оросын хувийн компани “Зарубежстрой”-д зарах ажлыг зохион байгуулсан гэх бөгөөд тэр нь бүтэлтэй болоогүй байсаар Ерөнхий сайдын суудлаас огцорчээ. Дараа нь Ж.Наранцацралтаар тэрийгээ хийлгэх гээд бүтээгүй гэх яриа өнөө ч тэнэж явдаг.

Дараа нь 2004 онд Ц.Элбэгдорж дахин Ерөнхий сайд, 2009 онд Ерөнхийлөгч болсон. 2013 онд хоёр дахь удаагаа Ерөнхийлөгч болоход нь “Эрдэнэт”-ийг авах тааламжтай нөхцөл бүрдсэн байж. Учир нь АН засгийн эрхэнд гараад байсан. Гэхдээ тэр үеийн Ерөнхий сайд Н.Алтанхуяг саад хийж мэдэхээр байсан тул огцруулаад Ч.Сайханбилэгийг Ерөнхий сайдаар томилуулж,улмаар 49 хувийг авах махинацаа эхлүүлжээ.

Сүүлд Ерөнхий сайд асан Н.Алтанхуяг “Намайг Ерөнхий сайд болсны дараа Ц.Элбэгдорж бид хоёрын хооронд нэг яриа болсон юм. Н.Алтанхуягаа чи бусад ажлаа хий, би “Эрдэнэт”-ийг хариуцъя гэж хэлсэн” хэмээжээ.

Мэдээж Н.Алтанхуяг “Эрдэнэт”-ийг Ц.Элбэгдоржид хариуцуулахыг хүсээгүй ч юмуу, ямартай ч тойргийн гадна үлджээ. Ингээд 2016 оны сонгуулийн өмнөхөн Ч.Сайханбилэгийн Засгийн газартай нам нийлж, сэм хуйвалдан “Эрдэнэт”-ийг авсан явдал өнөөгийн улстөрийн гол сэдэв,бас хөзөр болж байгааг бид мэднэ.

Ц.Элбэгдорж “Эрдэнэт” үйлдвэртэй холбоотой асуудалд ямагт л ач холбогдол өгч ирсэн. Түүнтэй холбоотой бас нэг асуудал нь Тамгын газрынх нь дарга асан П.Цагаан “Эрдэнэт”-ийн овоолгоос цэвэр зэс гаргадаг компанитай холбоотой гэх хэрэг явдал бас л олныг шуугиулдаг. АН-ын дарга, Монгол улсын Ерөнхий сайд асан Н.Алтанхуяг “Цензургүй яриа” нэвтрүүлэгт 2018 оны 12 сард оролцохдоо “Би Ц.Элбэгдорж, П.Цагаан хоёрт овоолгын шороо авч өгөх гэж ардчилсан хувьсгалд оролцсон юм уу. ГОК-ийн хажуу дахь “Эрдмин”, “Ачит эх” гэх хоёр компани Ц.Элбэгдорж, П.Цагаан хоёрынх. “Эрдэнэт”-ийг идсэн, ядаж овоолсон шороог нь ард түмэнд өгчих л дөө” гэж хэлж байв.

2016 оны УИХ-ын сонгуулийн үеэр Ц.Элбэгдоржийн шахаан дор Ерөнхий сайд Ч.Сайханбилэг, сайд Д.Эрдэнэбат нар “Эрдэнэт” үйлдвэрийн 49 хувийг УИХ-аас асуулгүйгээр давуу эрхээсээ татгалзан “Монголиан коппер корпорейшн”-д найр тавин авч өгсөн нь ойлгомжтой болоод байгаа. Харин 2016 оны намар Ц.Элбэгдорж Ерөнхийлөгч УИХ-ын индэр дээрээс Нэгэн цагт тарган саалийн үнээ байсан “Эрдэнэт” үйлдвэр одоо эмчилгээ тэжээлийн цэгт очсон хөгшин үнээ болсон” гэж байлаа. Мөн хугацаанаасаа есөн жил илүү ажилласан “Эрдэнэт”-ийг хаах тухай ярих хэрэгтэй гэж байв. Гэвч “Эрдэнэт”-д дахиад 40-50 жилийн нөөц байгааг энэ хооронд нэгэнт тогтоогоод байна. Гэсэн ч одоо Ц.Элбэгдорж 2-3 жилийн өмнөх байр суурин дээрээ байна гэдгээ илэрхийлсээр л явна. Энэ бүхнээс харахад ардчиллын алтан хараацай, Монгол Улсын дөрөв дэх Ерөнхийлөгч Ц.Элбэгдорж үхсэн ч сүнс нь “Эрдэнэт”-ийг тойрч гороолохоор тийм их ашиг сонирхолтой нь харагдана.
Эх сурвалж: Gereg.mn

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Дэргэдээ дадлагажих эмнэлэггүй хувийн 16 анагаах ухааны дээд сургуулийг аттестатчлалд оруулах хэрэгтэй юу?
  • Яаралтай оруулах хэрэгтэй
  • Хэрэггүй
  • Мэдэхгүй