Б.Чойжилсүрэн нарт холбогдож байсан компани Тосон бумбын нурууг ухаад эхэлжээ
2019 оны 4 сарын 12
RӨмнөговь аймгийн Гурвантэс сумын нутаг дахь Тост, Тосон Бумбын нуруу нь Монголд төдийгүй дэлхийд ховордсон цоохор ирвэс болон Монгол орны улаан номонд бүртгэгдсэн ан амьтад ургамалтай нутаг гэдгийг юуны өмнө сануулъя. Гэтэл Тостын нуруу орчим газарт уул уурхайн хайгуул, ашиглалтын тусгай зөвшөөрлүүд олгосноос таван тусгай зөвшөөрөл цуцлагдаж, үлдсэн 13 хайгуул, гурван ашиглалтын тусгай зөвшөөрөл байдаг аж. Байгалийн үзэсгэлэн бүрдсэн Тост бумбын нуруугаа хамгаалан нутгийн иргэд, ТББ-ууд, орон нутгийн засаг захиргааны удаа дараагийн хүсэлт, тэмцлээр дээрх зөвшөөрлүүдийн зарим нь үгүй болсон ч тодорхой нэг нь өндөр эрх мэдэл, их мөнгөний хөлд оршсоор байна уу хэмээн  нутгийн иргэд бидэнд хандлаа. Дашрамд дурдахад, тус үзэсгэлэнт газрыг хамгаалан тэмцэж байсан Ирвэс хамгаалах сангийн биологич 27 настай Т.Лхавгасүмбэрэл хэмээх залуу учир битүүлэг шалтгаанаар амиа алдсан хэрэг нийгмийн анхаарлаас өдгөө ч гараагүй байна.

Тэднээс ирсэн мэдээллийг дуулгахад, “Сауд гоби коэл транс” компани ашиглалтын 43153.96 га талбайг эзэмшдэг бөгөөд нутгийн уугуул иргэд тэмцэл өрнүүлсээр хориглож зогсоосон байдаг ч өдгөө “Сауд гоби коэл транс” компани ухаад эхэлснийг бидэнд дуулгав. Уг нь нутгийн иргэд удаа дараагийн тэмцлийн үр дүнд тус газрыг улсын тусгай хамгаалалтад авахуулсан гэдэг. Тэр ч бүү хэл эх сурвалжийн хэлснээр Мэргэжлийн хяналтын ерөнхий газраас Тост Тосон бумбын нуруунд шалгалт хийхэд “Сауд гоби коэл транс” компани ихээхэн хэмжээний нүүрс олборлон гаргасан тухай яриа ч бий. Нутгийн иргэд хэдэн жилийн өмнөөс “Сауд гоби коэл транс” компанитай гурван шатны шүүхээр маргаан дэгдээгээд байгаа ч ямар нэгэн шалтгаанаар тэдний талд шийдвэр гарсаар байгаа аж. 

Нутгийн иргэд тус компанийг “Хурд” группийн малгай дор 30 орчим компанийг 100 хувь эзэмшдэг эрхэм түшээ Б.Чойжилсүрэнгийнх хэмээн ярьж байсан. Энэ тухай хэвлэлүүд ч удаа дараа онцолдог болохоор нуух зүйл биш. Тэгэхээр эрхэм гишүүний нэр нөлөө юу, эсвэл өөр учир байна уу хэмээн хардахад хүргэж байна. Ийнхүү нутгийн иргэд орон нутаг, газар дээр нь тэмцэл өрнүүлээд зогсохгүй нийслэлд хүртэл ирж төр засагт дуу хоолойгоо хүргэнэ гэсэн юм. Энэ удаад ч Өмнөговь аймгийн Гурвантэс сумын иргэн Л.Сүрэнхүү Тост бумбын нуруунд нүүрлээд байгаа аюулын талаар дэлгэрэнгүй ярилцлага өгч, холбогдох хүмүүсийн сонорт хүргэмээр байна хэмээн хэвлэлийнхэнд хандаад байна.
Эх сурвалж: "ӨГЛӨӨНИЙ СОНИН"
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
УИХ тарахыг та дэмжиж байна уу?
  • Тийм
  • Үгүй
  • Мэдэхгүй
  • Бусад