УИХ-ын гишүүн Д.Дамба-Очирыг улсын нууц задруулсан хэргээр ТЕГ-аас шалгаж эхэлжээ
2019 оны 5 сарын 18
-УИХ-ААС ГАРСАН АЖЛЫН ХЭСГИЙН ДҮГНЭЛТИЙГ ОЮУ-ТОЛГОЙ КОМПАНИД ӨГСӨН-

УИХ-ын гишүүн Д.Дамба-Очир Оюутолгойн гэрээний хэрэгжилтийг шалгасан ажлын хэсгийн дүгнэлтийг “Оюутолгой” ХХК-д хүргүүлж, мэдээлэл задруулсан. Тэрээр “Оюутолгой” компаниас хүсэлт ирсэн учраас 43 хуудас материал хүргүүлсэн” гэж сэтгүүлчдэд тайлбарласан.

Тухайн үед ажлын хэсгийн дүгнэлтээс гадна АТГ-аас гаргасан Оюутолгойн асуудлаар шалгалт, Үндэсний аудитын газраас гаргасан дүгнэлт тэргүүтэй материалыг УИХ-ын гишүүдэд “НУУЦ”-ын зэрэглэлээр тараахаар бэлтгэсэн байсан. Тиймээс ч Д.Дамба-Очир гишүүний “Оюутолгой” руу илгээсэн бичиг дунд нууцын зэрэглэлд багтсан материал хамт явсан уу гэх асуудал хардлага дагуулаад байгаа юм. Түүнийг улсын нууц задруулсан байж болзошгүй гэж олон эх сурвалжийн зүгээс мэдээлсээр байна.

УИХ гишүүн Д.Дамба-Очирыг улсын нууц задруулсан хэрэгт холбогдуулан Тагнуулын ерөнхий газраас шалгаж эхэлжээ.

Мөн энэ сарын 16-ний өдөр МАН-ын Хяналтын ерөнхий хороо хуралдаж УИХ-ын гишүүнШ.Раднаасэдийн хамтаар түүнд хариуцлага тооцох шийдвэр гаргасан. Тодруулбал, УИХ-ын гишүүн Д.Дамба-Очирыг Эдийн засгийн байнгын хорооны даргаар ажиллаж байхдаа Оюутолгойд шалгалт хийсэн ажлын хэсгийн дүгнэлтийг Байнгын хорооны хуралдаанаараа хэлэлцүүлэхээс өмнө Оюутолгой компанид хүргүүлсэн хэмээн буруутгасан байна. Улмаар Хяналтын хорооноос түүнд таван жилийн турш МАН-аас улс төрийн дэмжлэг үзүүлэхгүй байх шийдвэр гаргасан билээ.

-ТӨРИЙН НУУЦ ЗАДРУУЛСАН БОЛ ТӨРИЙН АЛБАНААС БУУЛГАХ ЭСВЭЛ ХАЛНА-

Улсын нууц болон түүнтэй адилтгах мэдээлэл задруулсан тохиолдолд ямар хариуцлага хүлээлгэдэг тухай хуулийн заалтыг дэлгэрүүлэн хүргэж байна

39 дүгээр зүйл. Төрийн болон албаны нууцын тухай хууль тогтоомж зөрчигчид хүлээлгэх хариуцлага

39.1.Төрийн болон албаны нууцын тухай хууль тогтоомж зөрчсөн этгээдэд холбогдох хууль тогтоомжийн дагуу эрүүгийн, зөрчлийн болон сахилгын хариуцлага хүлээлгэнэ.

39.2.Төрийн болон албаны нууцын тухай хууль тогтоомж зөрчсөн албан тушаалтны үйлдэлд эрүүгийн хариуцлага хүлээлгэхээргүй бол тагнуулын байгууллагаас дараахь хариуцлага хүлээлгүүлэхээр харьяалах дээд шатны байгууллага, албан тушаалтанд санал тавьж шийдвэрлүүлнэ:

39.2.1.энэ хуулийн 6.2, 6.3, 15.1 дэх хэсэг, 27, 28 дугаар зүйлд заасан үүргээ биелүүлээгүй албан тушаалтны албан тушаалын цалингийн хэмжээг гурван сар хүртэл хугацаагаар 20 хүртэл хувиар бууруулах;

39.2.2.энэ хуулийн 6.2, 6.3, 15.1 дэх хэсэг, 27, 28 дугаар зүйлд заасан үүргээ удаа дараа биелүүлээгүй, мөн 38.4-т заасан үүргээ биелүүлээгүй албан тушаалтныг албан тушаал бууруулах, албан тушаалаас нь огцруулах, төрийн албанаас халах.

39.3.Харьяалах дээд шатны байгууллага, албан тушаалтан нь холбогдох албан тушаалтандаа энэ хуулийн 39.2-т заасан хариуцлага хүлээлгэж, энэ талаар 14 хоногийн дотор тагнуулын байгууллагад хариу мэдэгдэнэ.

39.4.Энэ хуулийн 39.2-т заасныг биелүүлээгүй, эсхүл биелүүлэхээс үндэслэлгүйгээр татгалзсан бол тухайн албан тушаалтанд хариуцлага хүлээлгэх саналыг тагнуулын байгууллагаас түүнийг томилох, чөлөөлөх эрх бүхий байгууллага, албан тушаалтанд тавьж шийдвэрлүүлнэ.

39.5.Тагнуулын байгууллагаас энэ хуульд заасан бүрэн эрхийнхээ хүрээнд гаргасан шаардлага, шийдвэрийг хүлээн авсан байгууллага, албан тушаалтан, иргэн түүний дагуу холбогдох арга хэмжээг авч, хариу мэдэгдэх үүрэгтэй.

39.6.Энэ хуулийн 39.5-д заасныг зөрчсөн этгээдийг шүүгч ерэн зургаагаас дөрвөн зуун наян тооцооны нэгжтэй тэнцэх хэмжээний төгрөгөөр торгоно хэмээн заажээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй