Оросын сэтгүүлчид цагдаатай “дайн зарлав”
2019 оны 6 сарын 10
Оросын “Коммерсантъ”, РБК болон “Ведомости” сонинууд хамтран хар тамхины хэрэгт буруутгагдан баривчлагдсан “Медуза” сайтын сэтгүүлч Иван Голуновыг гэм буруу гэдэгт итгэж буйгаа илэрхийлэн сониныхоо шинэ дугаарын нэгдүгээр нүүрийг “Би/Бид Иван Голунов” гэсэн гарчигтайгаар гаргаж байгаа аж.


Баривчилгаа хийхдээ олон ноцтой алдаа гаргаж, хэрэгт хавсаргасан эд мөрийн баримтууд нь итгэл үнэмшил төрүүлэхгүй байгаа бөгөөд жилийн олон тэрбум рублийн эргэлттэй оршуулгын бизнестэй хутгалдсан төрийн томчуудын хуудууг “ухаж” байсан Голуновыг зохиомол хэрэгт буруутгаж байна хэмээн сэтгүүлчид үзэж байна.

Хэргийг сануулахад, энэ сарын 6-нд Иван Голуновыг саатуулж биед нь үзлэг хийхэд үүргэвчнээс нь 3,56 гр мефедрон мансууруулах бодис олдсон гэх бөгөөд гэрт нь нэгжлэг хийн 5 грамм кокаин олсон юм.

Хамгийн ноцтой нь, хэргийн газрын есөн гэрэл зургийн найм нь Голуновын байр огт биш байсан бөгөөд сэтгүүлч залууг баривчилсан гэх цагдаагийн ажилтнууд түүнийг араас нь дагаж яван саатуулахдаа үүргэвчинд нь гэнэтийн “бэлгийг” шургуулсан байх талтай гэж мэргэжил нэгтнүүд нь “хардаж” байгаа билээ.

Оросын соёл урлаг, шоу бизнес, спорт, сэтгүүлзүйн томчууд болох Константин Хабенский, Владимир Познер, Ксения Собчак, Тина Канделаки, Юрий Дудь, Noize MC, Оксимирон, “ДДТ” хамтлагийн ахлагч Юрий Шевчук зэрэг олон алдартнууд түүнийг гэм буруугүй гэдэгт итгэж байгаагаа илэрхийлж, хууль хяналтын байгууллагынханд асуудлыг шударгаар шийдэж суллахыг шаардаж байгаа юм.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй