АН-ын зөвлөл УИХ-ын хуралдааныг орхилоо
2019 оны 6 сарын 14
УИХ-ын чуулганы хуралдаан эхэллээ. Хуралдаанаар Үндсэн хуульд нэмэлт, өөрчлөлт оруулах хуулийн төслийг хэлэлцэх юм.

УИХ-ын гишүүн Д.Эрдэнэбат “Ардчилсан намын зөвлөл байнгын хорооны хуралдааны үеэр байр сууриа тодорхой хэлсэн. Энэ хуулийг хэлэлцэхээс өмнө хуульд тавьсан шаардлагыг нийцүүлж байж хэлэлцэж эхлэх ёстой шүү гэдгийг сануулж байна. Ерөнхийлөгчийн санал аваагүй, Үндсэн хууль хэлэлцэх журмын тухай хуульд тусгасан шаардлагыг хангаагүй, хуучин Дэгийн хуулиар хэлэлцэх байгаа нь буруу гэж харж байна. Олонхоороо түрээд батлах зүйл рүү явж байна гэж үзэж байна. АН-ын зөвлөл завсарлага авах эрх байхгүй, нэгдсэн дүгнэлт гаргах эрх байхгүй. Бидэнд хууль журмын дагуу хэлэлцэх, зөвшилцлөө зөв хийх, улс төрийн намуудын саналыг авч, ойлголцолд хүрэхийг анхааруулж байна. Тиймээс сөрөг хүчин бид хууль журмын дагуу эхлүүлэх хүртэл хуралдааныг АН-ын зөвлөл орхин гарахаас өөр сонголт алга” гэлээ.

Харин О.Баасанхүү гишүүн “Хуулийн зөрчлөө шийдэж, Ерөнхийлөгчийг ШХАБ-ын айлчлалаас эргэж ирсний дараа Үндсэн хуулийн нэмэлт, өөрчлөлтийг хэлэлцэж болохгүй юу. Ядаж УИХ-д суудалтай намууд, сөрөг хүчнээ сонсох хэрэгтэй байна” гэсэн юм.

Үндсэн хуульд нэмэлт, өөрчлөлт оруулах төслийг УИХ-ын нийт гишүүний дөрөвний гурваас доошгүй ирцтэйгээр хэлэлцэх ёстой. Өнөөдрийн чуулганы хуралдаанд нийт 75 гишүүн ирэх ёстойгоос 60 гишүүн буюу 80 хувийн ирцтэй байгаа учраас ийнхүү Үндсэн хуульд нэмэлт, өөрчлөлт оруулах төслийг хэлэлцэх эсэхийг хэлэлцэж эхэлсэн юм.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй