Б.Хурц Ж.Батзанданг дахин шүүхэд өгчээ
2019 оны 6 сарын 18
Зургаадугаар сарын 12-нд хуралдсан УИХ-ын Аюулгүй байдал, гадаад бодлогын байнгын хорооны хурлын үеэр Ж.Батзандан гишүүн ТЕГ-ын дарга асан Б.Хурцын талаар нэгэн ноцтой мэдээлэл хийсэн билээ. 

Тэрбээр “Хар тамхины наймааны ард тагнуулын байгууллага байгаа. Б.Хурцын бүлэг гэж тодорхой хэлье. Б.Хурц генералын байгуулсан хар тамхины наймааны бүлэг. Варшавын шүүхийн тогтоол миний гар дээр байна. Б.Хурцын ах дүү нар тамхины наймаа хийж байгаад баригдаад Варшавын шүүхээс ял авсан. Тамхины наймаачдын бүлэг хар тамхины наймааны бүлэг болж хувирлаа” гэж хэлсэн юм. 

Харин ТЕГ-ын дарга асан Б.Хурц “Ямар ч ор үндэслэлгүйгээр нэр хүндэд халдаж, онц ноцтой гэмт хэрэгт гүтгэсэн” гэж үзэн өчигдөр (2019.06.17) Баянзүрх дүүргийн Иргэний хэргийн анхан шатны шүүхэд Ж.Батзандан гишүүний талаар гомдол гаргажээ.

Хоёр эрхэм урьд нь ч шүүхдэлцэж байсан "туршлагатай" билээ. Ж.Батзандан гишүүн Төрийн ордонд нээлттэй сонсгол хийж “Б.Хурц Дамирангийн Энхбатыг Европын орнуудаар дамжуулан авчирч, тамлаж яргалж байсан. С.Зоригийг хөнөөсөн хэргийг илрүүлснийхээ төлөө генерал цолоор шагнуулсан. “Эрдэнэт”-ийн 49 хувийг ХХБ-д авч өгөх ажлыг зохион байгуулсан гол хүмүүсийн нэг” гэж ТЕГ-ын экс даргын эсрэг мэдэгдлийг өмнө нь хийж байв.

Тухайн үед Б.Хурц энэ асуудлаар Баянзүрх дүүргийн Иргэний хэргийн анхан шатны шүүхэд гомдол гаргаж, 2018 оны хоёрдугаар сарын 12-нд Б.Хурцын талаар хийсэн ор үндэслэлгүй мэдээллүүддээ няцаалт хийхийг Ж.Батзандан гишүүнд даалгах тухай шүүхийн шийдвэр гарч байсан юм байна. Гэвч Ж.Батзандан давж заалдаж, хэргийг анхан шатны шүүх рүү буцаажээ.

Энэхүү гомдлыг хэлэлцэх шүүх хурлыг 2019 оны зургаадугаар сарын 20-нд товложээ. Харин Б.Хурцыг хар тамхины хэрэгт гүтгэсэн гэх гомдлыг хэлэлцэх шүүх хурал хэдийд болохыг хараахан товлоогүй байна.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй