Улсад 313 сая төгрөгийн хохирол учруулсан цэргийн ангийн нягтлангийн хэргийг шүүхэд шилжүүлжээ
2019 оны 6 сарын 19
Зэвсэгт хүчний жанжин штабын харьяа цэргийн ангиудад ажиллаж байсан нягтлан бодогч бүсгүй байгууллагын мөнгөнөөс 300 гаруй сая төгрөг хувьдаа завшсан хэргийг өдгөө шүүхийн шатанд хэлэлцэж байна.

Хэрэгт холбогдогч Б гэгч нь дээд боловсролтой, нягтлан бодогч мэргэжилтэй бөгөөд Зэвсэгт хүчний жанжин штабын харьяа Зэвсэгт хүчний ... дугаар ангид 2014 оны 10 дугаар сарын 22-ны өдрөөс 2016 оны наймдугаар сарын 25-ны өдрийг хүртэл санхүүгийн туслах нягтлан бодогчоор ажиллаж байхдаа 313.305.310 төгрөг, Зэвсэгт хүчний 15...дугаар ангид 2016 оны наймдугаар сарын 25-ны өдрөөс 2017 оны хоёрдугаар сарын 09-ний өдрийг хүртэл санхүүгийн дарга, ахлах нягтлан бодогчоор ажиллаж байхдаа 60.277.358 төгрөг, нийт 373.582.668 төгрөгийг хувьдаа завшсан байна. 

Тэрбээр тус цэргийн ангид ажиллаж байгаад гадаад улсад суралцахаар явсан, өөр байгууллага руу шилжсэн, тэтгэвэрт гарсан зэрэг шалтгаанаар тус ангиудад ажилладаггүй, нийт давхардсан тоогоор 500 иргэний нэр дээр хий болон илүү цалин бичиж дээрх мөнгийг шамшигдуулсан нь мөрдөн байцаалтын явцад тогтоогджээ. Тэрбээр эл их хэмжээний мөнгийг садан төрлийн холбоотой Д-гийн Хаан банкны 50........ дугаартай дансанд шилжүүлж авах аргаар завшиж, их хэмжээний хохирол учруулсан гэмт хэрэгт холбогджээ.

Баянзүрх дүүргийн прокурорын газраас Б-ийн үйлдлийг Эрүүгийн хуулийн ерөнхий ангийн 1.9 дүгээр зүйлийн 1 дэх хэсгийг журамлан мөн хуулийн тусгай ангийн 17.4 дүгээр зүйлийн хоёр дахь хэсгийн 2.2 дахь заалтад зааснаар зүйлчлэн яллах дүгнэлт үйлдэж, хэргийг шүүхэд шилжүүлжээ.

Баянзүрх дүүргийн Эрүүгийн хэргийн анхан шатны шүүхээс түүнд дөрвөн жилийн хорих ял оноосон ч шүүхийн шийтгэх тогтоол биелүүлэхийг хоёр жилийн хугацаагаар хойшлуулах шийдвэр гаргасан байна.

Мөн Б-гээс 310.725.167 төгрөг гаргуулж Монгол Улсын Зэвсэгт хүчний Жанжин штабт олгохоор шийдвэрлэжээ.

Учир нь шүүгдэгч Б нь шүүх хурлын үед жирэмсэн байсан учир шийтгэх тогтоолыг хойшлуулж өгөх хүсэлт гаргасан байжээ. Харин давж заалдах шатны шүүхээс анхан шатны шүүхээс оноосон дөрвөн жилийн ялыг 5,1 жил болгож, мөн л ялыг нь хоёр жилээр хойшлуулах шийдвэр гаргасан байна.

Харин Улсын Дээд шүүх энэ хэргийг авч хэлэлцээд анхан болон давж заалдах шатны шүүх Эрүүгийн хуулийг буруу хэрэглэсэн гэж үзээд уг хэргийг анхан шатны шүүхээр дахин хэлэлцүүлэх шийдвэр гаргасан байна.

Учир нь 2015 оны Эрүүгийн хуулийн ерөнхий ангийн 7.6 дугаар зүйлийн 1 дэх хэсэгт “Шүүх анх удаа хөнгөн гэмт хэрэг үйлдсэн өсвөр насны хүн, жирэмсэн эмэгтэй, гурав хүртэлх насны хүүхэдтэй эх, ганц бие эцэгт хорих ял оногдуулсан шүүхийн шийтгэх тогтоол биелүүлэхийг хоёр жил хүртэл хугацаагаар хойшлуулж болно” гэж заасан байхад хүнд гэмт хэрэг үйлдсэн Б-д дээрх зохицуулалтыг хэрэглэсэн нь Эрүүгийн хэрэг хянан шийдвэрлэх тухай хуулийн 39.7 дугаар зүйлийн 1.2-т заасан хэрэглэх ёсгүй хуулийг хэрэглэсэн гэж үзэх үндэслэл болсон байна.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй