Хоригдсон шүүгчдийг суллаж, хилийн хориг тогтоожээ
2019 оны 7 сарын 9
Монгол Улсын Ерөнхийлөгч Х.Баттулгын зарлигаар зургаадугаар сарын 26-ны өдөр 17 шүүгчийн бүрэн эрхийг түдгэлзүүлсэн билээ. Өнгөрөгч долоо хоногт түдгэлдзүүлсэн шүүгчид болох Э.Халиунбаяр, Б.Цолмонбаатар нарыг нэг сарын хугацаатайгаар цагдан хориод байсан юм. Тэгвэл цагдан хоригдож буй дээрх шүүгчдийг өчигдрөөс батлан даалтад гаргаж, хилийн хориг тогтоожээ.

Чингэлтэй дүүргийн Эрүүгийн хэргийн анхан шатны шүүхийн Ерөнхий шүүгчид яллагдагч Э.Халиунбаяр, Б.Цолмонбаатар нарт авсан цагдан хорих таслан сэргийлэх арга хэмжээг хүчингүй болгуулахаар тэдний өмгөөлөгчдөөс гаргасан гомдлыг 2019 оны долоодугаар сарын 08-ны өдрийн шүүх хуралдаанаар хянан хэлэлцэж, тус шүүхийн 2019 оны долоодугаар сарын 4-ний өдрийн 239-я, 240-я дугаартай шүүгчийн захирамжийг хүчингүй болгож шийдвэрлэжээ.

Хэргийг сануулахад, тус дүүргийн шүүхээс Э.Халиунбаяр, Б.Цолмонбаатар нарт эрүүгийн хэрэг хянан шийдвэрлэх ажиллагаанаас оргон зайлахыг завдсан талаар үндэслэл бүхий баримт мэдээлэл байгаа гэсэн үндэслэлээр нэг сарын хугацаагаар цагдан хорих таслан сэргийлэх арга хэмжээ авсан юм.

Гэвч Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1.1-д заасан “эрүүгийн хэрэг хянан шийдвэрлэх ажиллагаанаас оргон зайлахыг завдсан” гэсэн үндэслэл тогтоогдоогүй. Өөрөөр хэлбэл яллагдагчид өмнө авсан таслан сэргийлэх арга хэмжээг зөрчсөн, оргон зайлахаар хийсэн үйлдэл байгааг нотолсон баримтыг шүүх хуралдаанд гаргаж өгөөгүй буюу дээрх хуулийн зүйл заалтыг нотолсон үндэслэл бүхий баримт мэдээлэл, нотлох баримт зэргийг мөрдөгч болон прокуророос шүүхэд гаргаж өгөөгүй аж.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Санал асуулга
УИХ тарахыг та дэмжиж байна уу?
  • Тийм
  • Үгүй
  • Мэдэхгүй
  • Бусад