Үндсэн хуулийн нэмэлт, өөрчлөлт хийх эсэхийг ард түмэн шийднэ
2019 оны 9 сарын 7
УИХ Үндсэн хуульд оруулах нэмэлт өөрчлөлтийн хоёрдугаар хэлэлцүүлгийг өчигдөр хэлэлцэж дууссан. УИХ-ын 62 гишүүний өргөн мэдүүлсэн төсөл, Ерөнхийлөгчийн өргөн мэдүүлсэн хуулийн төслийг нэгтгэн хэлэлцсэн.

УИХ-ын Төрийн байгуулалтын байнгын хорооны дарга С.Бямбацогт, УИХ-ын гишүүн Д.Тогтохсүрэн нар Үндсэн хуульд оруулах нэмэлт, өөрчлөлтийн төслийн талаар мэдээлэл хийж, Ард нийтийн санал асуулга явуулахаар болсныг мэдэгдлээ.

МАН-ын бүлгийн дарга, УИХ-ын гишүүн Д.Тогтохсүрэн: "Хоёрдугаар хэлэлцүүлэг дуусаж буйтай холбогдуулан өчигдөр орой МАН-ын бүлэг гуравдугаарт хэлэлцүүлэгт орох уу, ард нийтийн санал асуулга явуулах уу? гэдэг асуудлаар хуралдлаа. Гишүүдийн 100 хувийн саналаар бүх ард түмний санал асуулга явуулах нь зүйтэй гэж шийдвэрлэсэн.

Монгол Улс 1945 оны аравдугаар сарын 21-нд анх удаа тусгаар тогтнолоо баталгаажуулах бүх ард түмний санал асуулга явуулсан. Одоо энэ удаа Үндсэн хуульд нэмэлт, өөрчлөлт оруулах, эсэх асуудлыг ард түмэн өөрсдөө шийдвэрлэх санал асуулга болох юм гэлээ.

- Ард нийтээс ямар санал асуух вэ. Ард нийтээс санал авах хугацаа байна уу, зардал хэр их гарах вэ? гэсэн асуултад
- Ард нийтээс ганцхан санал асууна. Үндсэн хуулийн нэмэлт өөрчлөлтийг дэмжих үү, үгүй юу гэсэн ганц асуудлаар санал авна. Хугацааны хувьд хэлэлцэж тогтоогүй байна. Зардлын хувьд гэвэл Ерөнхийлөгчийн сонгуулийг зохион байгуулах хэмжээний зардал гарна хэмээн Д.Тогтохсүрэн гишүүн хариуллаа.

Ард нийтийн санал асуулга явуулах хугацааг зарласнаас хойш 45 хоногийн дотор санал асуулга явуулах бөгөөд энэ хугацаанд нэмэлт өөрчлөлтийн төслийн 34 зүйл заалтыг нэг бүрчлэн сурталчлах ажлыг зохион байгуулах аж.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
Үндсэн хуульд нэмэлт өөрчлөлт оруулахыг та зөв гэж бодож байна уу?
  • Тийм
  • Үгүй
  • Мэдэхгүй