Багшлахаар ирсэн гадаад иргэнийг хар тамхины хэргээр баривчиллаа
2019 оны 9 сарын 17
Өчигдөр 06:45 цагт Цагдаагийн ерөнхий газрын Хар тамхитай тэмцэх газрын алба хаагчид гүйцэтгэх ажиллагааны үр дүнд хар тамхи биедээ хадгалж явсан гадаадын иргэнийг баривчилжээ.

Тодруулбал, Их Британи Умард Ирландын Нэгдсэн Вант улсын иргэн, 41 настай, эрэгтэй С нь 2019 оны 08 дугаар сард гадаад хэлний гүнзгийрүүлсэн сургалттай, хувийн дунд сургуульд багшлахаар Монгол улсад иржээ.

Түүнийг баривчлагдах үедээ НҮБ-ын 1961 оны “Сэтгэцэд нөлөөт бодисын тухай конвенц”-ийн жагсаалтанд багтдаг 6 гр хар тамхины төрөл хадгалж явсан болох нь тогтоогдсон.

Түүний биеэс шээс авч хар тамхи илрүүлдэг тестээр шалгахад тодорхой төрлийн хар тамхи хэрэглэсэн болох нь мөн тогтоогджээ.

Уг гадаад улсын иргэнд холбогдуулан эрүүгийн хэрэг үүсгэж, яллагдагчаар татан шалгалтын ажиллагааг явуулж байна. Түүнд шүүхээс “хязгаарлалт тогтоох” буюу хуучнаар “хилийн хорих тавих” таслан сэргийлэх арга хэмжээ авсан гэж ЦЕГ-ын Хар тамхитай тэмцэх газраас мэдээллээ.

Эргэн сануулахад, өнгөрсөн нэгдүгээр сарын 28-ны өдөр Цагдаагийн ерөнхий газрын Хар тамхитай тэмцэх газрын алба хаагчид Нигер улсын 31 настай иргэн Тайланд улсаас Монгол Улсад шуудан илгээмжээр их хэмжээний хар тамхи оруулж ирснийг шуурхай илрүүлсэн билээ.

Нигер улсын иргэн Шон гэгч нь Монгол Улсад үйл ажиллагаа явуулдаг нэгэн сургалтын төвд англи хэлний цагийн багшаар ажиллаж байсан бөгөөд Хар тамхитай тэмцэх газрын алба хаагчид прокурорын хяналт дор түүнийг хэргийн газраас үйлдэл дээр нь баривчилж байсан юм.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
Сэтгэгдлийг ачааллаж байна ...
Санал асуулга
УИХ тарахыг та дэмжиж байна уу?
  • Тийм
  • Үгүй
  • Мэдэхгүй
  • Бусад